അക്ഷരം പഠിച്ച വിദ്യാലയത്തിലേക്ക് ഒരിക്കല്‍ കൂടി പ്രവേശിക്കുന്നത് ഓര്‍മ്മകളിലേക്കുള്ള മടക്കയാത്രയാണ്, പ്രത്യേകിച്ച് നാട്ടില്‍ നിന്നും കാതങ്ങള്‍ അകലെ ജീവിക്കുന്നവര്‍ക്ക്. കുട്ടിക്കാലത്തെ ഓര്‍മ്മകളിലേക്ക് തിരിച്ച് പോകാനുള്ള അവസരം. പഠിപ്പിച്ച അദ്ധ്യാപകര്‍, ഒപ്പം പഠിച്ച
വര്‍, കളി കൂട്ടുകാര്‍...... അവരെയൊക്കെ ഓര്‍ത്തെടുക്കാനുള്ള അവസരം. ഒരര്‍ത്ഥത്തില്‍ ഗൃഹാതുരത്വം ഉണര്‍ത്തുന്ന ഓര്‍മ്മകള്‍. ഇതിന് അവസരമൊരുക്കിയത് മൂന്നാര്‍ ഗവ: ലോവര്‍ പ്രൈമറി സ്‌കൂളിന്റെ പ്ലാറ്റിനം ജൂബിലിയും. 2024 നവംബര്‍ 23, 24 തിയതികളിലായിരുന്നു മൂന്നാറിന്റെ ചരിത്രത്തില്‍ അടയാളപ്പെടുത്തപ്പെട്ട ആഘോഷങ്ങള്‍. 1949 ല്‍ സ്‌കൂള്‍ ആരംഭിച്ചപ്പോള്‍ പഠിച്ച സര്‍വ്വശ്രീ ജോര്‍ജ് ജോണ്‍ (ബങ്കളൂര് ), ആര്‍ എസ് മണി, വി എ പരീത് എന്നിവര്‍ തുടങ്ങി ഇപ്പോള്‍ ഒന്നാം ക്ലാസില്‍ പഠിക്കുന്നവര്‍ വരെ ആഘോഷ പരിപാടികളില്‍ സംബന്ധിച്ചു. ഇതിന് പുറമെ എന്തിനും തയ്യാറായി ഈ സ്‌കൂളില്‍ പഠിക്കാത്തവരും ഒപ്പം കൂടിയപ്പോള്‍ അതു പഴയ മൂന്നാറിന്റെ ഉല്‍സവമായി. ബങ്കളൂര്, മുംബൈ, ഡല്‍ഹി തുടങ്ങി സംസ്ഥാനത്തിന് പുറത്തും അകത്തും നിന്നായി മുന്‍കാല വിദ്യാര്‍ത്ഥികള്‍ ഓടിയെത്തി.
 |
ഹൈറേഞ്ചിലെ ആദ്യ മലയാളം പള്ളിക്കൂടമാണ് മൂന്നാര്‍ ഗവ: എല്‍ പി സ്‌കൂള്‍. കണ്ണന്‍ ദേവന്‍ കമ്പനി 1926 ല്‍ മൂന്നാര്‍ ഹൈസ്‌കൂള്‍ ആരംഭിക്കുമ്പോള്‍ അതിനൊപ്പം മലയാളം പ്രൈമറി വിഭാഗവും ഉണ്ടായിരുന്നു. തമിഴ് പ്രൈമറി വിഭാഗം 1918 ല്‍ ATPS എന്ന പേരില്‍ ആരംഭിച്ചിരുന്നു. 1949 ല്‍ ഗവണ്‍മെന്റ് ഉടമസ്ഥതയില്‍ എല്‍ പി സ്‌കൂള്‍ സ്ഥാപിച്ചപ്പോള്‍ കമ്പനി സ്‌കൂളിലെ ഒന്ന് മുതല്‍ 5 വരെ അങ്ങോട്ട് മാറ്റി. കമ്പനി സ്‌കൂളുകള്‍ 1955 നവംബര്‍ 23 ന് സര്‍ക്കാരിന് കൈമാറി. ജൂബിലി ആഘോഷങ്ങള്‍ക്ക് നവംബര്‍ 23, 24 തിയതികള്‍ തിരഞ്ഞെടുത്തതും യാദൃശ്ചികം. മൂന്നാറില്‍ ആദ്യമായാണ് ഒരു സര്‍ക്കാര്‍ സ്‌കൂളിന്റെ ജൂബിലി ആഘോഷിക്കുന്നത്. മൂന്നാര്‍ GVHSS ഓള്‍ഡ് സ്റ്റുഡന്റ്സ് അസോസിയേഷനാണ് മൂന്നാര്‍ GLPS ന്റെ പ്ലാറ്റിനം ജൂബിലിയെ കുറിച്ചുള്ള ആലോചനകള്‍ക്ക് തുടക്കമിട്ടത്. വിദ്യാലയ വര്‍ഷാരംഭത്തില്‍ ആലോചന നടന്നുവെങ്കിലും 1924 ലെ മഹാപ്രളയത്തിന്റെ 100-ാം വാര്‍ഷിക ആചരണം ജൂലൈയില്‍ നടത്തണമെന്നതിനാല്‍ അതു കഴിയട്ടെയെന്നായി. തുടര്‍ന്ന് ആഗസ്ത് അവസാന വാരമാണ് സംഘാടക സമിതി രൂപീകരണം നടന്നത്. MLA ചെയര്‍മാനും ഗ്രാമ പഞ്ചായത്ത് പ്രസിഡണ്ട് കോ - ചെയര്‍മാനും വാര്‍ഡ് മെമ്പര്‍ ജനറല്‍ കണ്‍വീനറും പൂര്‍വ്വ വിദ്യാര്‍ത്ഥിയായ ജി മോഹന്‍ കുമാര്‍ കണ്‍വീനറും സ്‌കൂള്‍ ഹെഡ്മിസ്ട്രസ് ട്രഷററുമായി സംഘാടക സമിതി നിലവില്‍ വന്നു.
തുടര്‍ന്ന് സോഷ്യല്‍ മീഡിയ അടക്കമുള്ള മാധ്യമങ്ങളിലൂടെ ആഘോഷം സംബന്ധിച്ച അറിയിപ്പുകള്‍ വന്നു. കേരളത്തിനകത്തും പുറത്തും നിന്നുമായി അന്വേഷണമായി. പലരും 50 കഴിഞ്ഞവര്‍. നവംബര്‍ 23 നായി പലരും കാത്തിരിക്കുകയായിരുന്നു. മൂന്നാറില്‍ പൂര്‍വ്വ വിദ്യാര്‍ത്ഥികളും GVHSS OSA അംഗങ്ങളും ആഘോഷം ചരിത്ര സംഭവമാക്കാനുള്ള ഒരുക്കത്തിലായിരുന്നു. കണ്ണന്‍ ദേവന്‍ കമ്പനി ജീവനക്കാരുടെ മക്കള്‍ക്കും കമ്പനിയെ ആശ്രയിച്ച് ജീവിച്ചവരുടെയും മക്കള്‍ക്കും വേണ്ടി ആരംഭിച്ച വിദ്യാലയത്തിലെ പൂര്‍വ്വ വിദ്യാര്‍ത്ഥി - മുന്‍ അധ്യാപക സംഗമത്തിനും അതിഥികളായി എത്തുന്നവര്‍ക്കും വിദ്യാര്‍ത്ഥികള്‍ക്കും പ്ലാറ്റിനം ജൂബിലി മെമെന്റോ നല്‍കാനുള്ള തുക KDHPC വാഗ്ദാനം ചെയ്തു. പൂര്‍വ്വ വിദ്യാര്‍ത്ഥികള്‍ 200 രൂപ തുടങ്ങി 10,000 രൂപ വരെ സംഭാവന നല്‍കി. അതോടെ സംഘാടകര്‍ ആത്മവിശ്വാസത്തിലായി.
മൂന്നാര്‍ ഗവ: എല്‍ പി സ്‌കൂള്‍ ആഫീസില്‍ സംഘാടക സമിതി ഓഫീസ് തുറന്നതോടെ ആരംഭിച്ചു ഒരുക്കങ്ങള്‍. ദേവികുളം MLA അഡ്വ A രാജ ഉല്‍ഘാടനം നിര്‍വഹിച്ചു. ജനപ്രതിനിധികളും അദ്ധ്യാപകരും പൂര്‍വ്വ വിദ്യാര്‍ത്ഥികളും PTA ഭാരവാഹികളും സംബന്ധിച്ചു. തുടര്‍ന്ന് നവംബര്‍ 23നുള്ള കാത്തിരിപ്പായിരുന്നു. രാവിലെ സ്‌കൂള്‍ അങ്കണത്തില്‍ വാര്‍ഡ് മെമ്പര്‍ കെ അഷ്ടലഷ്മി ജൂബിലി പതാക ഉയര്‍ത്തി. ആദ്യ ബാച്ച് വിദ്യാര്‍ത്ഥി ജോര്‍ജ് ജോണ്‍ സാര്‍ ഭാര്യക്കും മകള്‍ക്കും പേരകുട്ടികള്‍ക്കും ഒപ്പം ബങ്കളൂരില്‍ നിന്നും രാവിലെ തന്നെ എത്തി. പിന്നാലെ മുംബൈയില്‍ നിന്നും ഉണ്ണികൃഷ്ണനും ഭാര്യയും പൂര്‍വ്വ വിദ്യാര്‍ത്ഥിനിയായ സഹോദരി സൗമിത്രിയും എത്തി. മൂന്നാറിലെ പൂര്‍വ്വ വിദ്യാര്‍ത്ഥികള്‍ കൂടി എത്തിയതോടെ ഉല്‍സവാന്തരീക്ഷമായി.
Lt Col ഡികോത്, സഹോദരന്‍ Col ലാന്‍സി, സഹോദരി തെരേസ (ദല്‍ഹി), മൂവാറ്റുപുഴയില്‍ നിന്നും സജീയും ഭര്‍ത്താവും പി പി ലളിതയും V K പ്രഭാകരനും തുടങ്ങിയവരും എത്തിയതോടെ പഴയ ക്ലാസ് മുറികള്‍ സജീവമായി. എ സുരേഷ് എത്തിയത് കുട്ടികള്‍ക്കുള്ള സ്‌കെച്ച് പെന്‍ സെറ്റുമായാണ്. SN ടൂറിസ്റ്റ് ഹോമിലെ സജീവ് എത്തിയത് രണ്ട് കെയ്സ് കുപ്പിവെള്ളവും ഒരു പെട്ടി ബിസ്‌ക്കറ്റുമായി. ദീര്‍ഘകാലത്തിന് ശേഷം മൂന്നാറില്‍ എത്തിയവര്‍ വിശേഷങ്ങള്‍ ചോദിച്ചറിയുന്നുണ്ടായിരുന്നു. പഴയ ഓര്‍മ്മകളുമായി ക്ലാസ് മുറികള്‍ അരനൂറ്റാണ്ടിന് അപ്പുറത്തേക്ക് പോയപ്പോള്‍ അദ്ധ്യാപകര്‍ക്കും കൗതുകം. ഉച്ചക്ക് സ്‌കൂളില്‍ തന്നെ ഭക്ഷണമൊരുക്കി. സമൂഹത്തിന്റെ ഉന്നത പദവിയിലുള്ള പൂര്‍വ്വ വിദ്യാര്‍ത്ഥികളെയും അവര്‍ക്കൊപ്പം വന്ന ഡോക്ടര്‍മാര്‍ അടക്കമുള്ളവരെയും സ്‌കൂള്‍ ഭക്ഷണത്തിന് ക്ഷണിക്കാന്‍ ഹെഡ്മിസ്ട്രസ് ലിസിക്ക് മഠി. ക്ഷണിച്ചാല്‍ വരുമോ എന്നൊരു സംശയം. എന്നാല്‍, ഞങ്ങളുടെ സ്‌കൂള്‍, ഞങ്ങളുടെ ഭക്ഷണം എന്നായിരുന്നു അതിഥികളുടെ നിലപാട്. റഷീദയും ശോഭനയും എത്തിയതോടെ ഫോട്ടോ സെഷന്‍ സജീവമായി. അപ്പോഴെക്കും വിളംബര ജാഥക്ക് സമയമായി. കുട്ടികളെ സ്റ്റാര്‍ട്ടിംഗ് പോയിന്റായ മോസ്‌ക് ജംഗ്ഷനിലേക്ക് കൊണ്ടുപോകാന്‍ ഗവ:ഹൈസ്‌കൂളിന്റെ സ്‌കൂള്‍ ബസുകള്‍ എത്തിയിരുന്നു. GLPS ല്‍ പഠിക്കാത്ത R മോഹന്‍, M വിശ്വനാഥന്‍ എന്നിവര്‍ എന്തിനും തയ്യാറായി മോസ്‌ക് ജംഗ്ഷനിലുണ്ടായിരുന്നു. അവിടം മുതല്‍ ഓള്‍ഡ് റെയില്‍വേ സ്റ്റേഷന് വരെയായിരുന്നു വിളംബര ജാഥ.
ഗ്രാമ പഞ്ചായത്ത് വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ റീന ജാഥ ഫ്ലാഗ് ഓഫ് ചെയ്തു. വഴിയൊരുക്കാന്‍ മുന്നിലും പിന്നിലും പൊലീസ്. വിളംബരവുമായി കൊട്ട് മേളം. രണ്ടു വരിയായി, ഗതാഗതം തടസപ്പെടുത്താതെ വിളംബര ജാഥ കടന്ന് പോകാന്‍ സൗകര്യമൊരുക്കാന്‍ മോഹന്‍ കുമാര്‍, ലിജി, K A മജീദ്, PTA പ്രസിഡന്റ് മുത്ത്, സുരേഷ് എന്നിവരും ഉണ്ടായിരുന്നു. കുട്ടികളെ വിവിധ വേഷം ധരിപ്പിച്ച് രക്ഷിതാക്കളും ഒപ്പം നിന്നു. ജാഥ സമാപിച്ചപ്പോള്‍ ഫുഡ് പാക്കറ്റുമായി KHRA മൂന്നാര്‍ യൂണിറ്റ് ORS പാലത്തിലുണ്ടായിരുന്നു.
നവംബര്‍ 24 ..... പഴയ മൂന്നാര്‍ ഉണര്‍ന്നത് കണ്ട് മറന്ന മുഖങ്ങളെ കണികണ്ടാണ്. പതിറ്റാണ്ടുകള്‍ക്ക് മുമ്പ് മൂന്നാര്‍ GLPS ല്‍ പഠിച്ചിറങ്ങി, ഉയരങ്ങളില്‍ നിന്നും ജീവിതത്തിന്റെ ഉയരങ്ങള്‍ തേടി പോയവര്‍ രാവിലെ തന്നെ എത്തി കൊണ്ടിരുന്നു. നിലവിലെ വിദ്യാര്‍ത്ഥികള്‍ രക്ഷിതാക്കളുടെ കൈ പിടിച്ചും സ്‌കൂള്‍ ഗേറ്റ് കടന്നു. കുട്ടികളെ പോലെ ചിലര്‍ പാര്‍ക്കിലെ കാഴ്ചകള്‍ കണ്ട് നടന്നു.
വന്നവരൊക്കെ നേരെ പോയത് ക്ലാസ് മുറികളിലേക്ക്. ഓരോത്തരും ഗേറ്റ് കടന്നു വരുമ്പോള്‍ അവരെ ആലിംഗനം ചെയ്യാന്‍ പഴയ കാര്യങ്ങള്‍ പങ്കുവെക്കാന്‍ കൂട്ടുകാര്‍ കാത്തുനിന്നു. ജീവിതത്തില്‍ വളരെ അപൂര്‍വ്വമായി മാത്രം ലഭിക്കുന്ന നിമിഷങ്ങള്‍ .....
സംഘാടക സമിതി ഭാരവാഹിയായ പി പി ലളിതയും സ്‌കുള്‍ സ്റ്റാഫ് സെക്രട്ടറി ഷേര്‍ളിയടെ നേതൃത്വത്തില്‍ അദ്ധ്യാപികമാരും ഓരോത്തരെയും സ്വീകരിച്ച് രജസ്ട്രേഷന്‍ കാര്‍ഡ് നല്‍കാന്‍ സജീവമായിരുന്നു. സ്‌കുള്‍ പിടിഎം സുലൈമാന്‍ സഹായിയായി ആകെ നിറഞ്ഞു നിന്നു. യുവ കവയത്രി ഡോണ പ്രിന്‍സ് കോമ്പയറുടെ ദൗത്യം ഏറ്റെടുക്കാന്‍ രാവിലെ തന്നെ എത്തി. സ്‌കുള്‍ ഹാളിന് സമിപം ആദ്യകാല മൂന്നാറിന്റെ ഫോട്ടോ പ്രദര്‍ശനവും ഒരുക്കിയിരുന്നു. ആകെ ഒരു ഉല്‍സവ മേളം.
പൂര്‍വ്വ വിദ്യാർഥിനികളും അദ്ധ്യാപികമാരും ചേര്‍ന്ന് പ്രാര്‍ഥനാ ഗാനം ആലപിച്ചതോടെയാണ് പരിപാടികള്‍ക്ക് തുടക്കമായത്. തുടര്‍ന്ന് ആദ്യ ബാച്ച് വിദ്യാർഥികളായ ജോര്‍ജ് ജോണ്‍, മുന്‍ദേവികുളം ബ്ലോക്ക് പഞ്ചായത്ത് വൈസ് പ്രസിഡന്റ് ആര്‍ എസ് മണി, ദേവികുളത്തെ ന്യുസ് ഏജന്റ് വി എ പരീത്, അടുത്ത തലമുറയിലെ സീബി ആന്റണി, ഇപ്പോഴത്തെ സ്‌കുള്‍ ലീഡര്‍ സാന്‍ഡ്ര, ഹെഡ്മിസ്ട്രസ് ലിസി ടി ആന്റണി എന്നിവര്‍ ചേര്‍ന്ന് ദീപം തെളിയിച്ചു. സംഘാടകരാരും വേദിയില്‍ ഉണ്ടായിരുന്നില്ലെന്നതാണ് പ്രത്യേകത.
തുടര്‍ന്ന് മൈക്ക് സദസിലേക്ക്...... നിരവധി പേര്‍ പഴയ ഓർമകള്‍ പങ്കുവെച്ചു. സ്‌കൂള്‍ മുറ്റത്ത് ഓടി കളിച്ചതും തൊട്ടടുത്ത ആറ്റില്‍ ചാടി കളിച്ചതും കാല് മുറിഞ്ഞതും തുടങ്ങിയ പഴയകാല ഓര്‍മകള്‍......ലോവര്‍ പ്രൈമറി ക്ലാസുകളിലെ ഓര്‍മകള്‍ കേള്‍ക്കാന്‍ തന്നെ രസം. അന്നത്തെ കാളവണ്ടികളും സ്‌കൂളിന് മുകളിലൂടെയുള്ള റോപ് വേയും ഒക്കെ പുതിയ തലമുറക്ക് പുതിയ അറിവുകള്‍........
പ്ലാറ്റിനം ജൂബിലി സമ്മേളനത്തില്‍ സംബന്ധിക്കാന്‍ എത്തിയ വിശിഷ്ട അതിഥികളും ഇതൊക്കെ ആസ്വദിക്കുന്നുണ്ടായിരുന്നു. പ്ലാറ്റിനം ജൂബിലി സമ്മേളനം എ രാജ എം.എല്‍.എയാണ് ഉല്‍ഘാടനം ചെയ്തത്. ഗ്രാമ പഞ്ചായത്ത് പ്രസിഡന്റ് ദീപ രാജ്കുമാര്‍ അദ്ധ്യക്ഷത വഹിച്ചു. വിരമിച്ച അദ്ധ്യാപകരെ KDHPC മാനേജർ ജേ ൺ പെരേര ആദരിച്ചു. ജനപ്രതിനിധികളും മറ്റും ആശംസകള്‍ നേര്‍ന്നു.
ഉച്ചഭക്ഷണത്തിന് പിരിയുമ്പോഴെക്കും കുട്ടികളുടെ കലാപരിപാടികള്‍ക്ക് തുടക്കമായി. തുടര്‍ന്ന് പുര്‍വ്വ വിദ്യാര്‍ഥിയായ ടി ടി ജെയിംസും ജോണ്‍ ക്വീന്റസും നേതൃതം നല്‍കിയ ഗാനമേള അരങ്ങു തകര്‍ത്തു. പൂർവ്വ വിദ്യാർത്ഥികളും പാടി. വന്നവര്‍ ഓരോത്തരായി മടങ്ങാന്‍ തയ്യാററെടുക്കുമ്പോഴും പലര്‍ക്കും സ്‌കൂള്‍ മുറ്റം വിടാന്‍ മടി. എല്ലാവരും പ്ലാറ്റിനം ജൂബിലി മെമെൻേറായും വാങ്ങി ഇനിയും ഹൈസ്‌കുളിന്റെ ശതാബ്ദി ആ്ഘോഷങ്ങള്‍ക്ക് കാണാമെന്ന് പറഞ്ഞാണ് മടങ്ങിയത്. ഗാനമേള കഴിഞ്ഞതോടെ ഹെഡ്മിസ്ട്രസ് പ്ലാറ്റിനം ജൂബിലി പതാക താഴ്ത്തി. അതോടെ രണ്ടു ദിവസത്തെ ആഘോഷങ്ങള്‍ക്കും കൊടിയിറങ്ങി.
പുര്‍വ്വ വിദ്യാര്‍ഥികള്‍ അല്ലെങ്കിലും അതിനേക്കാളും ആവേശത്തോടെ തുടക്കം മുതല്‍ ഒപ്പം നിന്ന ജില്ലാ പഞ്ചായത്ത് സ്ഥിരം സമിതി അദ്ധ്യക്ഷ അഡ്വ. എം ഭൗവ്യ, ബിആര്‍സി കോ ഓര്‍ഡിനേറ്റര്‍ ഹെപ്സി കൃസ്റ്റിനാല്‍, ബ്ലോക്ക് പഞ്ചായത്തംഗം ജാക്വലിന്‍ മേരി, എസ്. സജീവ്, ആര്‍ മോഹന്‍, എം വിശ്വനാഥന്‍ തുടങ്ങിയവരെ മറക്കാനാകില്ല. പരിപാടി വിജയിപ്പിക്കുന്നതിൽ മൂന്നാറിലെ അടക്കം മാധ്യമ പ്രവർത്തകർ പിന്തുണ നൽകി. മൂന്നാറിലെ മാധ്യമ പ്രവർത്തകരുടെ നേതൃത്വത്തിലാണ് പബ്ലിസിറ്റി കമ്മിറ്റി പ്രവർത്തിച്ചത്. താല്‍ക്കാലിക സ്റ്റുഡിയോ തുറന്ന് ആവശ്യക്കാര്‍ക്ക് ഫോട്ടോ പ്രിന്റ് നല്‍കിയ ആതവന്‍ ഫോട്ടോസിലെ മാരിമുത്തു, തിരക്കുകള്‍ മാറ്റി വെച്ച് ആദ്യവസാനം സേവന പ്രവര്‍ത്തനങ്ങള്‍ ഏറ്റെടുത്ത ചേലക്കല്‍ ഗണേശ്, സി കെ ബാബുലാല്‍,വി കെ പ്രഭാകരന്‍, പി എസ് സതീഷ്, ലിജി, സണ്ണി ഇലഞ്ഞിക്കല്‍, എ സുരേഷ്തു , സജി തുടങ്ങി എത്രയോ പേര്‍. ഇതേസമയം, ഇതിനോട് പുറം തിരിഞ്ഞു നിന്നവരുമുണ്ട്. അതും സ്‌കൂള്‍ വളപ്പിലെ ചിലര്‍.
മലയാളം സ്‌കുള്‍ അണെങ്കിലും കുട്ടികള്‍ തമിഴ് വംശജരാണ് എന്ന പ്രത്യേകതയും ഈ സ്‌കൂളിനുണ്ട്. ഒരിക്കല്‍ അടച്ചു പൂട്ടലിന്റെ വക്കില്‍ എത്തിയതായിരുന്നു സ്‌കൂള്‍. ഹെഡ്മാസ്റ്ററായി എത്തിയ കാളിയപ്പൻ സാറാണ് പുതിയ "മന്ത്രം " ചൊല്ലി സ്‌കുളിനെ നിലനിര്‍ത്തിയത്. അന്നു മുതല്‍ തമിഴ് അദ്ധ്യാപകരെയും നിയമിച്ചു തുടങ്ങി. മുന്നാര്‍ മേഖലയിലെ തമിഴ് വംശജര്‍ മലയാളം പഠിച്ചു തുടങ്ങിയത് കേരളത്തില്‍ പി എസ് സി പരീക്ഷ എഴുതാനാണ്. അവരുടെ പിന്‍തലമുറയും അതേ വഴിക്ക് പോകുന്നതിനാല്‍ ഈ സ്‌കുളില്‍ എത്തുന്നവരില്‍ ബഹുഭൂരിക്ഷവും തമിഴ് വംശജര്‍......................
പരിപാടിയിൽ എത്താനാകാത്ത വിഷമത്തിൽ അങ്ങ് ദൂരെ ഇരുന്ന ഇന്ദിര ചേച്ചിയും ലഷ്മി ചേച്ചിയും നസീമുദീനും തുടങ്ങി പലരും ഇടക്കിടെ വിളിച്ച് കാര്യങ്ങൾ അന്വഷിക്കുന്നുണ്ടായിരുന്നു. അതാകട്ടെ ഞങ്ങൾക്ക് ഏറെ സന്തോഷം പകർന്നു.
.jpeg)
.jpeg)
